د پاکستان د مؤقت صدراعظم د نننیو ادعاوو په اړه باید ووایو، لکه څرنګه چې اسلامي امارت په افغانستان کې امن او سوله غواړي همدا راز په پاکستان کې هم امن غواړي.
اسلامي امارت هیچاته اجازه نه ورکوي چې د افغانستان خاوره د پاکستان په ضد استعمال کړي.
خو افغانستان اسلامي امارت په پاکستان کې دننه د امن د ټينګولو مسئولیت نه لري، هغوی باید خپل کورني مسائل پخپله حل کړي او د خپلو ناکامیو ملامتي افغانستان ته راجع نه کړي.
داچې د اسلامي امارت د بریا څخه وروسته په پاکستان کې نا امني زیاته شوې، د دې دلیل نشي کیدای چې ګڼې موږ به د پاکستان د نا امنیو تر شا یو.
په افغانستان کې وسلې محفوظې دي، د هیچا لاسته نه دي ورغلی، د وسلو قاچاق ممنوع دی او د هر ډول غیر قانوني اقداماتو مخه نیول شوې.
افغانستان د یو ورور او ګاونډي هېوادو په شان له پاکستان سره د ښو اړیکو غوښتونکی دی، پاکستانی اړخ هم باید د اسلامي امارت ښه نیت درک کړي او د اسلامي امارت په هغه اراده باندې هيڅ شک ونه لري چې د نورو هیوادونو په چارو کې مداخله او د هغو په ضد اقدامات کول نه غواړي.
ذبیح الله مجاهد د اسلامي امارت ویندوی
۲۴/۴/۱۴۴۵هـ ق
۱۷/۸/۱۴۰۲هـ ش ــ 2023/11/8 م
