د افغانستان اسلامي امارت د ریاست الوزراء اداري مرستیال محترم مولوي عبدالسلام حنفي ازبکستان ته د سفر په جریان کې، د هغه هیواد مقاماتو سره د خپلو کتنو او له فرهنګي او لرغونو سیمو څخه د لبدنو په لړ کې پرون بخارا ولایت ته سفر وکړ.
بخارا ولایت ته د ریاست الوزراء اداري مرستیال په رسېدو سره د یاد ولایت والي او دولتي مقاماتو د هغه هرکلی وکړ او وروسته یې د بخارا والي ښاغلي باتور ظریفوف سره وکتل.
ښاغلي باتور ظریفوف محترم مولوي عبدالسلام حنفي او مل پلاوي ته د ښه راغلاست پرمهال وویل، ازبکستان او افغانستان د زیاتو فرهنګي او تاریخي مشترکاتو لرونکي دي چې له هغو څخه په استفادې د دواړو هیوادونو رهبران کولای شي دوه اړخیزې اړیکې پیاوړې کړي.
د ریاست الوزرا اداري مرستیال محترم مولوي عبدالسلام حنفي د ازبکستان مقاماتو د کوربه توب د مننې او قدرداني ترڅنګ وویل، افغانستان او ازبکستان د بېساري تاریخي قدامت او همدارنګه په اسلامي فرهنګ او تمدن کې د ښه مقام لرونکي دي او له دې جایګاه څخه د ښې استفادې په صورت کې کولای شو دوه اړخیزې اړیکې تر پخوا لازیاتې پیاوړې کړو.
محترم مولوي عبدالسلام حنفي او مل پلاوي په دې سفر کې د بخارا اسلامي او تاریخي ځایونو څخه لیدنه وکړه.
د یادونې ده چې بخارا ولایت په بېلابېلو سوداګریزو، فرهنګي او ټولنیزو برخو کې له افغانستان سره د پیاوړو تعلقاتو لرونکی دی.
